曼联上季聘请南非名将麦卡菲出任前锋教练，佢嘅工作一直受到好评，拉舒福特上季大爆发同海伦近期重生，据报麦卡菲功劳好大。呢位46岁名将早前暗示想正式执教後，消息指南非凯撒酋长有意搵佢坐正，麦卡菲随时会离开曼联。
曾效力阿积士、波图、布力般流浪嘅麦卡菲，喺曼联专责教导一众攻击球员，丹麦前锋海伦日前透露：「麦卡菲同我哋几个前锋开会，一齐睇片研究边度做得唔好、边度需要加强，你可以见到我同队友依家更加容易搵到大家。」
麦卡菲早前受访曾表示想尝试做主帅，网站《Soccer-Laduma》报道，南非劲旅凯撒酋长将麦卡菲列为新帅两大目标之一，而佢对返南非执教亦持开放态度，尤其如果曼联夏天炒坦哈格，整个教练团预计亦会被「开刀」，麦卡菲有好路会考虑「走先」。
