冰岛名将基菲尔施古臣，3年前卷入性丑闻而离开爱华顿後，上年重返球坛兼重新入选国家队，今年初因伤患困扰，同丹麦球会宁比解约，日前决定返冰岛落班，签约冰岛劲旅华路亚2年。近日落选冰岛欧国附名单後，施古臣表示非常失望，表明坚持踢波只系为继续入选国家队。
得悉冇份出战对以色列嘅欧国附後，34岁嘅施古臣表示：「好失望，我继续踢波嘅最大原因，就系为咗可以继续享受代表冰岛上阵，过去几个月我一直努力准备呢轮大战，可惜事与愿违。我觉得自己比上年入选嗰阵状态更好，我相信我可以继续为国家队贡献。」
施古臣上年10月重返冰岛踢欧国外，喺对列支敦士登一战即梅开二度，成为冰岛史上「士哥王」。冰岛领队夏利迪表示唔拣施古臣，系因为佢只系啱啱伤愈，国家队大门仍然会为佢打开。
