曼联中场般奴费南迪斯近日再成风头人物，喺「红魔鬼」上场英超不敌富咸後，富咸喺官方TikTok频道出片，讽刺般费「诈伤」。曼联领队坦哈格对呢件事非常不满，已公开要求富咸就事件道歉。
富咸喺TikTok出嘅片段，见到般费禁区外边走边射，射门後突然抱住左脚脚胫痛苦倒地，举手向球证投诉兼碌咗两个圈，眼见球证冇理会，而且曼联继续进攻後，般费突然痛苦尽消弹起身要求交波。富咸喺影片附注「好庆幸佢冇事......」，影片随即被网民疯传。
对於富咸嘅攻击，坦哈格就极度不满：「我唔知呢件事(TikTok影片)，但如果富咸有做就好唔应该，一间球会作出咁嘅声明完全系错误，真系冇晒规矩，富咸应该为呢件事道歉！」坦哈格喺上场英足盃对森林後，批评森林恶意攻击般费，亦指网上批评般费嘅声音「可悲」。
