周四(22日)凌晨另1场欧联16强首回合，巴塞隆拿前锋罗拔利云度夫斯基入波打开纪录，以35岁零184日成为球队史上最大年龄欧联淘汰赛入波球员，但巴塞都系保唔住胜果，作客被拿玻里逼和1比1。
巴塞隆拿今仗反客为主，表现占尽上风，全场有12次射门，多拿玻里1倍，但都要踢到60分钟先至入波，柏迪直传，罗拔利云度夫斯基喺禁区内冷静射入，职业生涯喺欧联累积入93球，仅次於C朗(140球)同美斯(129球)。
由於巴塞隆拿前2届欧联都系分组赛出局，球队相隔1078日之後，再次喺欧联淘汰赛入波，而对上1位入波球员正系美斯。
不过，巴塞隆拿只系开心咗15分钟就被对手扳平，病愈复出嘅域陀奥森汉喺禁区内转身抽射入网，拿玻里今场唯一一次射门中目标就入波，逼和1比1。
