约旦首次打入亚洲盃4强，前锋阿尔奈马特功不可没，呢位24岁射手今届赛事已经入2球及2次助攻，表现一鸣惊人，吸引欧洲球会注意，有望跟随队友艾达马去法甲搵食。
今届亚洲盃喺卡塔尔举行，令效力当地球队多哈艾阿里嘅阿尔奈马特变相有半个主场之利，并踢出超水准，佢喺首场分组赛对马来西亚，立即贡献2次助攻，对南韩一役，更加射入反超前1球，并喺16强对伊拉克，再次建功为约旦先开纪录。
身高1米84嘅阿尔奈马特步大力雄，走位灵活，经过今届赛事精彩表现，人气急升，盛传有可能去欧洲搵食，最大机会加盟蒙彼利埃，皆因队友艾达马现时效力呢支法甲球队，会方希望再次引入平靓正亚洲兵。
