周日（4日）晚英超焦点战，曼联强阵出击下，凭海伦先开纪录及阿历真度加拿祖梅开二度，喺主场以3比0击败「锤仔帮」韦斯咸。
曼联今仗除咗般奴费南迪斯、海伦、拉舒福特等主力悉数担正外，上仗对狼队攻入绝杀士哥嘅小将马恩奥，继续获委以重任，伤愈冇耐上仗末段後备落场嘅中坚哈利马古尼，亦获得正选披甲，夥拍利辛度马天尼斯扼守中路，韦斯咸新兵加云菲腊斯因上仗交出「自杀式」助攻畀对方孭晒镬，明显未适应，今场先任後备，前线以古达斯与禾特普斯，支援箭头查洛保云攻坚。
韦斯咸今仗初段反客为主，艾臣奥马艾华利斯接应角球近射，畀奥拿拿神勇地翻身救出。曼联站稳阵脚後亦抢番主动，23分钟卡斯米路妙传畀海伦，佢於禁区顶劲射破网，打开纪录，呢位丹麦箭头连续4场有士哥，脚风转顺，半场红魔领先1比0进入更衣室。
换边後继续系曼联嘅世界，48分钟搵到第二个入球，般奴费南迪斯进攻左路斩向左边，阿历真度加拿祖接应，起左脚射波，皮球撞中韦斯咸後衞阿古特改变方向，收死半场入替嘅门将法比安斯基，领先至2比0。
