曼联上仗英超大胜韦斯咸3比0,阿历真度加拿祖梅开二度,表现非常抢镜,但佢入波之後坐上广告牌,扮C朗庆祝姿势,可能会再次引起阿根廷国家队队友不满,将来为国出征,随时会被孤立。
众所周知,阿历真度加拿祖一向视C朗为偶像,入波之後往往会做出呢位葡萄牙巨星庆祝动作,包括跳起空中转身「Siu」,同埋双手放心口,今次轮到扮C朗坐上广告牌。阿根廷名将迪马利亚早前公开告诫加拿祖唔好再扮C朗:「如果我系加拿祖,就唔会模仿C朗。」相信系由於C朗同阿根廷球王美斯系宿敌,迪马利亚认为加拿祖作为阿根廷新晋国脚,冇理由撑对手。不过,阿历真度加拿祖一於懒理,当迪马利亚冇到。