亚洲盃8强大战，2支冠军热门澳洲同南韩正面交锋。澳洲今届展现出超强防守力，4场比赛只系失过1球，钢铁防线成为佢哋争霸最大法宝；南韩分组赛有前冇後嘅疯狂踢法几乎出事，上仗已转阵踢得保守啲，今仗都唔敢轻举妄动，2.5球入球细值博。（HOY TV 77台周五晚11时30分直播）
澳洲嘅锋力相比日、韩等劲旅唔算强大，不过领队艾莱特采用控球踢法，稳阵行先嘅策略就相当成功，佢哋近8场比赛有7场保持清白身，成功为球队带嚟7胜1和嘅不败走势。今仗面对实力强横嘅南韩，生死战肯定会继续稳中求胜，佢哋近6场就有5仗总入球开2球或以下。
另边厢，南韩喺16强凭互射12码淘汰沙特阿拉伯，连续第3仗喺完场前入波「续命」，整体演出的确未符理想。南韩喺分组赛入8球失6球，差劲防守饱受批评，德国籍领队奇连士文上仗就改踢3中坚，防守的确系稳定落嚟，不过孙兴民同黄喜灿呢对英超组合未挞着，要破澳洲防守都唔系易事。
