英超榜首利物浦今季攻力强劲，近4场比赛就有3场攻入对手4球或以上，根据数据分析师Statman Dave统计，红军今季已经创造737次射门，冠绝欧洲5大联赛，亦系唯一创造射门突破700大关嘅球队。不过，领领队高普认为，曼城先至系英超「统治者」，似乎想转移视线，为球队减压。
利物浦上场英超对车路士，全场有28次射门，成为自2003/04年球季以来，对车仔最多射门嘅球队之一，如非达云纽尼斯4次射门中柱楣，红军唔止赢4比1，因此被睇好可以夺取今季英超冠军。
主帅高普出席对阿仙奴嘅赛前记者会期间，反而话曼城先至王者：「咁多年以来，我哋学到一点，如果想同曼城竞争，最好要赢晒所有比赛，现时英超由曼城统治，佢哋踢出令人难以置信嘅足球，并且永远唔会满足，就算曼城现时积分落後，仍然有出色表现。」
