曼联前锋拉舒福特日前被影到连续2晚通宵夜蒲，搞到连操练都去唔到，曼联周一(29日)发官方声明，表示已经内部惩处，球员已为自己嘅行为负责，事件告一段落。曼联希望大事化小，不过有关拉舒福特「夜蒲故事」继续连载，醉爆丑态全曝光。
拉舒福特隐瞒连续2晚喺爱尔兰夜蒲，英国《太阳报》搵到负责招呼佢哋嘅女侍应Sarah Adair爆料，佢指「福仔」当日狂饮酒，甚至随身自备Tequila；同行仲有2男2女，其中一名法国籍美女同拉舒福特虽然唔似好熟，但动作亲昵。
Sarah表示拉舒福特之後邀请佢加入，转场继续饮酒，明显系「不醉无归」。Sarah指拉舒福特之後同法国美女争执，女方投诉「福仔」锡其他女仔，当时拉舒福特已经醉爆，Sarah送佢返酒店房嗰阵，「福仔」更喺袋入面跌咗一大叠20镑银纸，估计有接近1万镑。保镳之後安排Sarah去另一间房瞓，第2日得悉拉舒福特喺凌晨5点已离开酒店。
