周六(27日)英足盃第4圈出现史上最大爆冷之一，地区联赛球队梅德士东联，作客2比1击败英冠前列份子叶士域治，两队喺英格兰联赛金字塔排名相差98位。梅德士东联成为46年来，首支跻身英足盃16强嘅第6级联赛球队。
梅德士东联系英格兰全国联赛南区球队，属於第6级联赛，而叶士域治目前排英冠第2名，被睇好下季升上英超，虽然2队排名差距足足有98位，但梅德士东联有巴西门将哥禾兰踢到上身，全场作出12次扑救，最终2比1爆冷赢波，成为自1978年嘅斯巴坦斯後，首支入英足盃16强嘅第6级联赛球队。
梅德士东联领队伊路高比表示：「我哋好多人喊出嚟，面对咁有历史同今季咁劲嘅叶士域治，赛前我哋讲好要用尽每一分力，呢场胜仗会记一世，喺英足盃近100年都未有人创造过呢个奇迹，英足盃童话仍然存在！」
