英联盃决赛戏码出炉！利物浦周四(25日)凌晨作客1比1打和富咸，两回合合计赢3比2，纪录性第14次杀入英联盃决赛，2月26日嘅「王者战」将同老对手车路士争夺冠军。利物浦同车路士近20年第5次喺盃赛决赛碰头，之前4次决赛双方各捧2冠，势均力敌。
首回合领先2比1嘅利物浦，开波11分钟就由路易斯迪亚斯个人表演，左路推大位抽射入网。富咸急起直追，下半场抢番唔少攻势，55分钟利物浦门将基利靴严重犯错，但安达斯彭利拿窄位射空门中柱弹出；富咸喺77分钟由伊沙迪奥普追平，可惜为时已晚，利物浦以总比数3比2晋级决赛。
今次系利物浦纪录性第14次杀入英联盃决赛，如果捧盃更会成为首支10度封王球队，领队高普赛後表示：「今场有好多事令我开心，但讲到尾，最重要嘅事都系晋级，喺呢个伟大嘅夜晚，我哋唔需要踢华丽嘅足球，而系为入决赛而战，我哋成功咗！」
