周四(25日)凌晨非国盃分组赛最後一轮，4场比赛加埋只系出现1个入球，摩洛哥喺F组以1比0击败赞比亚首名出线，呢个入波同时带挈主办国科特迪瓦，以最後一支「最佳第3名」身份晋级16强。讽刺嘅系，科特迪瓦日前已宣布炒领队加锡鱿鱼，淘汰赛冇正式主帅督师。
分组赛最後4轮非常保守，南非对突尼西亚、纳米比亚对马里、坦桑尼亚对刚果民主共和国3仗都系0比0，全日唯一入波就由摩洛哥嘅薛耶治一箭定江山，1比0击败赞比亚。赞比亚今场只要拎1分，就可以成为4支「最佳第3名」之一晋级，但结果未能成功，科特迪瓦以3分赶上「尾班车」。
东道主科特迪瓦今届演出差劲，3场分组赛1胜2负，上场吞赤道畿内亚4蛋後，随即宣布将法国主帅加锡同佢副手比连顿解约，喺未有新领队上场前，暂时会由40岁嘅前国脚化尔暂时领军，佢之前冇任何执教一队嘅经验。科特迪瓦16强会对夺标热门塞内加尔，形势凶险。
非国盃16强形势
尼日利亚 VS 喀麦隆
安哥拉 VS 纳米比亚
佛得角 VS 毛里塔尼亚
摩洛哥 VS 南非
马里 VS 布基纳法索
塞内加尔 VS 科特迪瓦
埃及 VS 刚果民主共和国
