【林卓臻卡塔尔多哈直击】南韩亚洲盃E组最後一轮赛事，喺领先情况下最终被马来西亚逼和3比3，虽然成功晋级16强，但分组赛表现难令人信服，南韩国内都对「太极虎」至今表现唔收货，赛後被选为今场最佳球员的南韩队长孙兴民，出席记招时为受批评的队友护航，至於主教练奇连士文则承认球队表现有待改善。
今场最後时刻被马来西亚追和，孙兴民对战果感到失望，同时不忘称赞对手嘅表现：「要畀掌声对手，到最後一刻都冇放弃，对於南韩今日战果系令人失望，最紧要系我哋闯入咗16强，要好好准备嚟紧嘅比赛。」
「太极虎」分组赛表现欠缺说服力，引起南韩国内唔少人不满，赛後有南韩记者问佢点睇有球员遭批评时，原本用英文作答嘅孙兴民，突然转台讲韩文，语气诚恳咁回应：「呢个问题想用韩文答，有件事我想拜托南韩媒体，希望你哋同球员企喺同一阵线，保护南韩队，有队友因为受到批评，而感到被伤害，呢啲批评有时太过火，我哋成队波都好hurt，见到队友咁痛苦我都好伤心，佢哋有屋企人，有啲有子女，喺作为球员之前，佢哋都系普通人。」
南韩遭马来西亚逼和後，最终攞到小组第二，成功喺16强避开另一夺标大热日本，不过赛後主教练奇连士文就否认有意「走线」：「今日失3球唔喺我哋嘅计划之中，我觉得马来西亚3个入波之中，有两球系唔应该发生，避开日本都唔系我哋嘅目标，我哋原本嘅目标系以小组首名晋级。」南韩上届虽然於8强止步，但全程只失过两球，今届踢分组赛已经失咗6球，不过奇连士文仍然信心十足，形容真正嘅挑战系由淘汰赛开始，相信球队能够一路杀入决赛兼夺冠。南韩16强将会面对沙特阿拉伯，赛事喺香港时间下周三（31日）凌晨举行。
