周一(22日)凌晨英超大战，状态大勇嘅利物浦开杀戒，作客4比0大炒般尼茅夫，依家喺榜首领先次席嘅曼城5分，向冠军全速迈进。「红军」箭头达云纽尼斯今场大爆发，同迪亚高祖达各入2球，今届各项赛事有10入波+10助攻嘅「双双」成绩，证明利物浦冇签错人。
头45分钟两队势均力敌，不过利物浦下半场发力即连珠炮发，49分钟一次美妙组织，由达云纽尼斯先开纪录；79分钟迪亚高祖达入楔射成2比0，呢位葡萄牙前锋9分钟後再入1球；补时阶段达云纽尼斯接应长传门前撞射入网，协助利物浦大胜4比0完场。
达云纽尼斯喺2022年夏天加盟後，把握力一直备受批评，甚至被闹系「水货」。不过呢位乌拉圭前锋今季全面爆发，成为今季第1个达到10入球同10助攻嘅英超球员，今仗梅开二度，亦令佢职业生涯入球突破100大关，证明自己8,500万镑(约8.5亿港元)转会费物有所值。
利物浦下半场爆发，其中一个原因系高普将达云纽尼斯由左翼移入中间，高普表示：「喺沙拿缺阵下，有好多唔同组合可以用，下半场我决定将纽尼斯摆番喺佢个位置(中路)，而且我哋向前压逼，令般尼茅夫感受到更强大嘅压力系第1步，最终我哋拎到应得嘅3分。」
