纽卡素总裁伊利斯早前证实，球会因财政问题可能被逼卖主力，巴西中场般奴古马雷斯被视为「开刀」热门，法甲豪门巴黎圣日耳门(PSG)对佢更虎视眈眈。正当传闻吹得火红火绿，般奴古马雷斯近日就同家人现身巴黎，西班牙媒体更指佢要求「尽早转会」，令纽卡素球迷非常担心。
据巴西同西班牙传媒报道，26岁嘅般奴古马雷斯成为PSG教练安历基嘅收购头号目标，《每日体育报》更指呢位巴西国脚希望「尽早转会」。唔知有心定巧合，佢日前就选择同家人去巴黎度假，畅游艾菲尔铁塔、迪士尼乐园等景点。不过，转会权威Fabrizio Romano表示：「般奴古马雷斯去巴黎系私人性质，同巴黎圣日耳门无关，纽卡素冇打算喺1月份卖走佢。」
