周二(9日)凌晨英足盃第3圈赛事，曼联作客2比0轻取英甲球队韦根，保住今季捧盃希望。曼联喺盃赛抽签继续行大运，第4圈对手将会系英乙嘅纽波特郡或非联赛球队伊斯特利。2024年成功打响头炮後，领队坦哈格豪言新老板上场後，将会喺新一年展开大反击！
虽然对手只系英甲球队，不过抖咗壬超过1星期嘅曼联精锐尽出，全场压逼主队并制造大量射门机会，如果唔系把握力差早就大胜一场。曼联喺22分钟开纪录，达洛治禁区边熨射死角入网，第2个入波要到74分钟先出现，般奴费南迪斯禁区内博到12码，佢亲自操刀射入，曼联全场28次射门下赢2比0晋级。
曼联喺英超大落後，欧联、英联盃亦已出局，英足盃成为今季唯一捧盃希望，而佢哋签运亦冇得顶，第4圈对手系英乙纽波特郡或非联赛球队伊斯特利，晋级冇太多悬念。第4圈仲有唔少瞩目大战，包括衞冕嘅曼城作客热刺、车路士主场恶斗阿士东维拉等等。
