英足盃第3圈赛事，英冠球队米杜士堡主场出击，越级挑战英超劲旅阿士东维拉。维拉今季气势如虹，喺英超一跃成为争标分子，不过佢哋一向唔太重视英足盃，今季联赛、欧协联双线作战下，好大机会放弃呢项赛事，令米杜士堡有机可乘，让球主胜不妨一试。（无綫myTV SUPER周日凌晨1时30分直播）
维拉依家喺英超高踞次席，上望冠军、下望前4，联赛肯定系重中之重；领队艾美利属欧洲赛专家，之前带西维尔同维拉利尔都赢过欧霸盃，现时已晋级16强嘅欧协联亦属争霸目标，反而英足盃吃力不讨好，重视程度肯定唔高。
翻查纪录，维拉近年出战英足盃几乎全面投降，对上8场英足盃全部输晒，而之前7届都喺第3圈出局，包括畀史提芬纳治、彼德堡等弱旅踢出局，似乎并非巧合，摆明无心争冠，加上本身自己兵源亦唔算充足，宁愿早啲出局，留力应付其他战线好过。
