英足盃第3圈开打，两支英超球队对碰揭开序幕，由水晶宫主场迎战爱华顿。两军目前都喺英超排榜下游，但爱华顿系因为被扣分先排尾4，实际表现唔算太曳；水晶宫一向唔重视盃赛，护级先系最大目标，而且佢哋近4次斗爱华顿输咗3次，今晚「拖肥糖」平手盘玩得过。（无綫myTV SUPER周五凌晨4时直播）
水晶宫上场联赛以3比1击败宾福特，总算终止8场不胜，但球队长期积弱系不争事实，一场胜仗未必能挽回近期劣势，联赛护级系水晶宫首要任务。领队「鹤臣爷爷」一向目标为本，教水晶宫咁多年，深知球队位置，总之每年望住联赛榜嗰40分返工，要知道降班就会搞到球会冇咗1亿镑（约9.88亿港元）收入，所以佢哋一向唔重视英足盃，近4届有3次第3圈就出局，其中两年系鹤臣执教，能够晋级第4圈嗰年就系韦拉带队，咁样讲大家就明，鹤臣如何「限米煮限饭」。
