英国富商拉特克利夫收购曼联25%股份之後，首要工作系为红魔鬼制定转会计划，除咗早前传出睇中古拉斯、迪姆华拿同祖普莫亭等前锋之外，呢位「化工大王」亦有意增强翼锋人脚，头号目标系水晶宫快翼米高奥利斯，愿意以6,000万镑(约6亿港元)收购呢位22岁法国新星，取代表现长期低迷嘅安东尼马菲奥斯。
曼联正前锋位置已经有海伦，加上拉舒福特亦可以踢呢个位置，右翼先至系红魔鬼最弱一环，安东尼马菲奥斯成「魔」以来一直冇货交，查顿辛祖已被放弃，加上格连活特回巢机会唔大，所以拉特克利夫认为有必须签入翼锋。
米高奥利斯2021年夏天由雷丁加盟水晶宫之後，一直有出色发挥，可以胜任翼锋及进攻中场，佢今季大熟大勇，英超上阵9次射入5球及1次助攻，吸引到拉特克利夫注意。
米高奥利斯上年8月同水晶宫续约4年，周薪增加至10万镑(约100万港元)，并设有6,000万镑毁约金，如果曼联想签入呢位猛将，估计需要出呢个价钱，先至有得倾，而且水晶宫应该唔会季中放人，预料最快都要今夏先至可以完成交易。
曼联近年曾经收购水晶宫前锋韦费特沙夏、右闸云比沙卡，但效果欠佳，重金买米高奥利斯，都系一场「豪赌」。
