曼联2024年有新景象，圣诞节完成收购25%股份嘅拉特克利夫，当地时间周二(2日)首度喺奥脱福球场现身，据报佢将会同领队坦哈格会面，并展开冬季转会计划。消息指曼联已决定提前终止借用利古朗，亦正同多蒙特商讨外借查顿辛祖，而前锋增兵计划亦曝光，古拉斯、迪姆华拿同祖普莫亭系目标人物。
拉特克利夫喺保安陪同下，首次去奥脱福「返工」逗留2个钟头，同球会嘅主要成员会面，日内亦会同领队坦哈格见面。虽然坦哈格嘅转会话事权已被褫夺，但据英国《每日邮报》报道，坦哈格将会要求保留合约内列明嘅「转会反对权」，避免签入佢唔想要嘅球员。
拉特克利夫喺曼联嘅角色仍要等英超赛会下月「确认」，不过冬季转会计划已全速开动，清洗球员方面继日前云迪碧克外借法兰克福，曼联亦决定终止利古朗嘅借用合约，提前将佢送番去热刺；德国传媒更指曼联正同多蒙特洽谈借用查顿辛祖，目前就借用费、薪酬承担等细节磋商，成事机会唔细。
