曼联喺英超创造奇迹，绝地反胜阿士东维拉3比2，阿历真度加拿祖居功厥伟，呢位阿根廷翼锋以19岁零178日，打破奥云嘅纪录，成为英超史上喺圣诞「拆礼物日」最年轻入2球或以上嘅球员，普遍舆论认为加拿祖先至最有资格着曼联7号，美臣蒙特应该让出呢件传奇波衫。
阿历真度加拿祖上月底英超作客爱华顿，使出惊天倒挂金勾入波，今仗仲犀利，原本可以上演帽子戏法，但其中一个入波被吹越位，但无损佢成为赢波功臣，赛後获英超官方选为今场最佳球员。
加拿祖话：「能够帮曼联反胜系一种非常好嘅感觉，我哋系曼联，永不放弃，今日系我一生之中最美好嘅日子。」加拿祖今场梅开二度仲有另一个意义，就系打破奥云1999年圣诞「拆礼物日」创下嘅英超最年轻入2球或以上嘅纪录，当时呢位英格兰名宿20岁零12日，加拿祖今次将纪录改写为19岁零178日。
