曼联完成股份易手，绝对系球队利好消息，改革换人嗰啲太远唔讲，净系今场新老板拉特克利夫入场睇波，球员喺场上都会加多两钱肉紧，以防饭碗不保，呢点肯定即时见效。
曼联近况确系一般，主场接连不敌般尼茅夫及拜仁慕尼黑，尤其主场以0比3不敌般尼茅夫，更系曼联喺英超史上首次对「下半版」球队输3球或以上，今场再喺奥脱福出击，知耻近乎勇，再输波肯定畀球迷嘘爆。曼联今季曾经试过两次主场2连败，之後都及时反弹赢波，今场被全面睇淡，随时又杀「淡友」一个措手不及。
今场「红魔鬼」阵容上会有少许变动，联赛硬系开唔到斋嘅海伦预计会退居後备，由拉舒福特挂帅，至於上场控甩波搞到输第2球嘅小将马恩奥都会抖抖，基斯甸艾历臣将顶替佢嘅位置，曼联攻守力度都将会加强。
