平安夜英超独脚戏，两支近况一般嘅球队对碰，狼队主场迎战车路士。狼队近5战只得1胜1和3负，状态一般唔想再全失3分，必然加强防守，「蓝战士」受严重伤兵困扰，加上上周中踢咗场英联盃8强，球员体力未回复，作客亦唔会急於抢攻，半场和机会高唱入云。
由於今季英超有歇冬，加上赛会应承圣诞新年快车期间，唔会再出现有球队需要48小时内踢两场嘅情况，为迁就各队赛程编排，所以今季出现罕见嘅平安夜英超，今场系史上第二次，第一次系1995年列斯联主场对曼联嘅「玫瑰打吡」，当年列斯联赢3比1。
讲番今场波，应该就唔会好似当年咁，有4个入波咁多，预料都系闷战。狼队虽然有主场之利，但球队上周惨败0比3畀韦斯咸，今场唔敢乱嚟，话晒比赛时间系当地平安夜下昼，输波影响夜晚庆祝心情嘛，宁愿死守打吓突击，求住1分博3分，唔输就OK。
