车路士继续沉伦，喺平安夜英超作客狼队，以1比2输波，联赛作客4连败，这个圣诞不快乐！
上周中英联盃惊险射赢12码晋级嘅车路士，有中场核心安素费南迪斯因喺嗰场受伤而缺阵，另一贵价中场摩西斯卡些度更连後备都冇份，主帅普捷天奴改用乌高祖克胡拍住干拿加历查任双防中，将前锋尼高拉斯积逊移去左路，让布查出任中锋，狼队继续靠黄喜灿数胡。开波初段史达宁两番妙传畀尼高拉斯积逊，可惜佢唔系来迟半步就系控甩脚，其後轮到史达宁获得单刀机会，但佢选择唔交畀队友，自己贪功快射，却被狼队门将荷西沙亚封出，非常嘥料。上半场末段狼队抢番主动，其中黄喜灿单刀射高最有威胁，半场互交白卷。
易边後主场嘅狼队继续施压，不断玩高空轰炸，中坚图迪高美斯劲顶过唔到车仔门将柏度域救出，但过到初一过唔到十五，51分钟勒美拿接应角球顶入，终於打破僵局。车仔屋漏偏逢连夜雨，乌高祖克胡因伤退下火线，普捷天奴索性连布查都换走埋，一口气换入梅迪历同啱啱伤愈嘅尼干古，尼干古一入场即有黄金机会，可惜畀图迪高美斯护到空门。
