卢顿队长洛克尔喺周六(16日)深夜英超比赛途中，突然心脏病发昏迷倒地，几乎搞出人命，近20年发生多次球员心脏出现问题，甚至导致猝死，最轰动系2003年6月洲际国家盃4强，喀麦隆球员科尔喺比赛中，突然倒地，事後证实佢死於隐性心脏病。曼联中场基斯甸艾历臣喺2年前欧国盃，亦试过心脏出事晕倒，幸好可以康复，阿根廷射手阿古路就冇咁好彩，被逼结束球员生涯。
心脏病已成为球场「隐形杀手」，比任何伤患更可怕，继2003年科尔猝死之後，2007年当时年仅22岁嘅西维尔後衞佩亚达亦喺比赛之中昏迷，虽曾恢复意识，但送院後因心脏衰竭逝世。
两年之後，当时刚被任命为队长嘅26岁爱斯宾奴中坚查基，随球队於意大利集训後，返回酒店同女友倾电话时，突然心脏病发去世。另外，2012年4月，25岁嘅利禾奴中场摩路仙尼，喺为球队上阵踢意乙嘅赛事当中突然不省人事卧倒球场，其後因队医抢救无效逝世。
近年亦有球星遭受心脏问题困扰，导致足球事业受打击，荷兰国脚戴利白兰特曾於比赛时，突然感觉头晕，最後检查发现佢患有心肌炎，需要安装一个皮下植入式心律转复除颤器，用来调节心率，防止心脏骤停。
