浦和红钻喺世冠盃杀入4强，将会挑战「地上最强」曼城，荷兰前锋阿历士舒贺克踢完世冠盃後将会离队，临别秋波上仗竟然成为晋级英雄，佢表明会倾尽全力斗曼城，希望为近2年嘅日本生涯画上完美句号。
阿历士舒贺克上年3月登陆浦和红钻，但受到伤患影响表现令人失望，2季日职加盟只得2个入球，上月宣布踢埋今季就会离队，世冠盃成为佢最後一项赛事。上仗面对墨超嘅利昂，後备上阵嘅阿历士舒贺克射入全场唯一入波，绝对系佢浦和红钻生涯最重要入球。呢位31岁前锋表示：「实在太神奇，能够射入一个咁决定性嘅入球简直系梦想成真，我好开心可以回报球迷嘅支持。」
浦和红钻晋级後，意味阿历士舒贺克仲有2场比赛要踢，对於即将挑战王者曼城，呢位荷兰前锋表示：「曼城系世界最佳球队，能够同佢哋交手系红钻嘅荣幸，1场过嘅比赛冇人会知发生咩事，所有日本人都会注视呢场比赛，我哋一定会倾尽全力为日本争光，我会为浦和红钻奋战到最後一刻。」
