英超上演「双红会」，榜首利物浦主场硬撼「红魔」曼联。「红军」近期联赛赢到开巷，气势如虹，相反「红魔」啱啱喺欧联出局兼损兵折将，加上近年造访晏菲路球场例冇运行，此消彼长之下，「红军」让球半、两球都冇有怕，照捧上盘。（Now 621及611周一凌晨零时30分直播）
利物浦近期行运一条龙，单计联赛近5场取得4胜1和，除咗作客逼和曼城1比1，令对手连续23场主场全胜断缆外，面对富咸同水晶宫都喺末段反败为胜，尽显韧力。王牌穆罕默德沙拿於对水晶宫之役攻入扳平士哥，系佢喺「红军」生涯第200球之余，亦系佢今季联赛第11个士哥，脚风甚顺。
相反，曼联正行紧衰运，各项赛事近4场输咗3场，唔单止喺上场联赛主场惨吞般尼茅夫3蛋，成为佢哋英超史上对下游球队主场最大败仗，仲喺日前欧联A组以0比1不敌拜仁慕尼黑，包尾出局令士气低落。嗰场仲有後防主力哈利马古尼受伤，连同中场核心兼队长般奴费南迪斯要坐波监，阵容天残地缺。
