周三(22日)早上世界盃外围赛南美洲区，两大宿敌巴西同阿根廷交锋，果然充满火药味，开赛前双方球迷喺观众席上发生严重冲突，造成多人受伤。比赛亦延迟开波，最後阿根廷顶住压力，作客以1比0击败巴西。
当时球场公布阿根廷正选名单时，主场巴西球迷狂嘘对手，最大镬系两队球迷先口角，继而动武，互掟杂物。以美斯为首嘅阿根廷球员曾经走到场边劝交，但都系冇作用，惟有暂时离开球场，期间美斯向电视镜头做出「唔想踢」手势，其後警察成功控制场面，令比赛可以进行。
阿根廷球员冒住「返唔到屋企」风险，由中坚奥达文迪63分钟顶入角球，以1比0小胜巴西，6战5胜1负排榜首。不过，美斯踢到78分钟受伤退下火线，但应该并唔严重，赛後仍然可以同队友庆祝。
