英超利物浦主场硬撼宾福特。虽然红军主场威力强劲，但有主力阿历斯麦亚里士打坐波监，中场拦截力弱上加弱，宾福特擅於稳守突击，随时偷袭抢到先机，不妨捧「蜜蜂仔」第一队入球。（Now 621周日晚10时直播）
利物浦一向主场特醒，开咧後各项赛事喺晏菲路球场踢咗8仗，全部赢晒兼狂轰24粒，确系客队嘅「凶地」。不过红军防守欠稳未见改善，先喺上轮联赛作客侥幸逼和卢顿1比1，日前欧霸大轮换下作客图卢兹更输2比3，认真肉酸。
利物浦最大问题系冇个硬净防中做扫荡，常用嘅3位中场阿历斯麦亚里士打、苏保斯拉尔同赖恩格云贝治偏重进攻，主帅高普焗用阿历斯麦亚里士打出任防中效果麻麻，呢位阿根廷国脚今仗仲要停赛，拦截力进一步受削，随时中门大开。
另边厢，宾福特摆脱早前低迷，近5仗取得3胜1和1负，输波嗰场系补时连失两粒反输畀曼联，明显欠运，单计近3仗更加全胜，包括击败车路士同韦斯咸，绝对唔失礼。
