曼联今季防守错漏百出，防线伤兵满营下，领队坦哈格最近先试出最可靠嘅中坚组合，可惜近期获器重嘅老将庄尼伊云斯，喺欧联对哥本哈根只系踢15分钟就伤出，令球队被逼要再用华拉尼+哈利马古尼嘅组合，令人担心近期翻生嘅马古尼会「打回原形」。
今仗系35岁嘅庄尼伊云斯，相隔10年後再为曼联出战欧联，可惜呢位北爱尔兰国脚早段疑似大腿拉伤，15分钟就退下火线由华拉尼入替，加入劳基梳尔、利辛度马天尼斯等後防「十字兵」行列，最惨系佢同马古尼嘅合作最近先至稳定，依家又要推倒重来。
由於马古尼同华拉尼都系擅长踢右中坚，合作踢双中坚效果差劲，坦哈格最近就将左中坚重任交畀庄尼伊云斯，连带马古尼亦有「翻生」表现，如果庄尼伊云斯要缺阵一段时间，马古尼好可能要踢番经常「出事」嘅左中坚，随时成为计时炸弹。
