周六(4日)英超早场，备受压力嘅曼联作客富咸，凭般奴费南迪斯补时绝杀，险胜1比0全取3分，曼联今场赢来有运，但哈利马古尼撞亲个头都搏到尾，都算系咁。
曼联今仗变阵，消息话拉舒福特受伤被收起，改用阿历真度加拿祖，後防有云比沙卡复出，但华拉尼仲未好番，要用庄尼尹云斯拍哈利马古尼，富咸就有安达斯彭利拿倒戈，韦利安同伊禾比双翼齐飞。
比赛初段哈利马古尼就撞亲个头，经治疗後冇乜事，但就因为佢喺8分钟一次死球攻势，掂唔到波但又有参与进攻，结果球证睇完VAR判佢越位，搞到麦汤米尼入波被判诈胡，连累曼联未能早段领先，半场互无纪录。
下半场曼联攻势疲弱，而且哈利马古尼又见头晕，59分钟出场治理，之後继续坚持比赛，反而65分钟坦哈格换走毫无表现嘅「契仔」安东尼马菲奥斯，反观富咸攻势旺盛，韦利安三番四次施射，好在奥拿拿顶得住。
