今轮利物浦主场迎战爱华顿，呢场默西赛德郡打吡每次都踢到「飞沙劈石」，红牌经常出现。之前揸车过去两队嘅球场，两个主场只系相距4分钟车程，真系行都行到去，唔怪得两班球迷次次都咁重火药味。
但如果睇番今年暂时成绩，利物浦系占优。喺联赛榜第4位嘅利物浦，之前主场全部赢晒仲要场场入3球，虽然近两场作客都拎唔晒3分，不过表现唔差，射手穆罕默德沙拿上场对住白礼顿更梅开二度，以5球成为球队入波泉源。国际赛期几位国脚级人物都有好表现。唯一隐忧系苏格兰国脚安德鲁罗拔臣受伤，今场未必可以上阵，到时就要睇睇森美卡斯嘅演出，可唔可以喺边线继续有助攻。
