曼联门将奥拿拿今季取代「金手套」迪基亚，季初噩梦表现饱受批评，继名宿舒米高插佢「唔识救波」後，另一位英超着名门将舒华沙亦加入批评行列，直指奥拿拿作为龙门「技术平庸」，如果连要佢用脚嘅战术都发挥唔到，喺曼联就冇碇企。
澳洲门将舒华沙曾喺英超打滚接近20年，效力过米杜士堡、富咸、车路士等球会，佢日前对奥拿拿表现作出批评：「我呢几年都有留意奥拿拿，佢上季喺国际米兰踢得好好，但我总系有啲疑问。奥拿拿脚法好好，但佢之前踢阿积士同国米都系超班球队，大部份时间控制比赛，佢可以慢慢踩住个波嚟踢，但喺英超系两个世界，如果佢连用脚都发挥唔到，咁佢究竟擅长啲乜？老实讲我觉得佢作为龙门，把关技术只系平庸，如果坦哈格唔系曼联领队，佢就冇碇企。」
