曼联欧联不敌拜仁慕尼黑，录得3连败，而且畀人感觉返回前季苏斯克查、兰历克时期嘅乱象，英媒分析，反对坦哈格呼声已经抬头，而且愈嚟愈高涨，当曼联被列强抛离，坦帅就好大机会落台，而时间大约系圣诞前後。
由於曼联今场攻入拜仁3球，因此坦哈格仍然口硬，认为输波只系「运气差」，攻入拜仁3球至少攞1分，但就唔提拜仁几次危险攻门中柱，曼联唔使大败已经好彩，报道曼联权威传媒《曼彻斯特晚报》为全队打分，11名正选有9人唔合格，合格线以上6分亦只有取得入球嘅海伦同卡斯米路。
虽然坦哈格仍然得到高层信任，就算开季成绩差，同球员不和，甚至被爆收取回佣，坦帅地位暂时仲稳阵，不过如果球队再输落去，例如嚟紧联赛对般尼同水晶宫，再赢唔到波嘅话，坦哈格地位势必动摇。
