英格兰翼锋查顿辛祖2年前，以7,300万镑(约7.3亿港元)转会费加盟曼联，原本被视为球队未来核心，可惜呢位天才新星发展未如人意，最近更同领队坦哈格公然反面，前途成疑。据英国传媒报道，查顿辛祖加盟曼联後，同球会上下有过唔少恩怨情仇，最终落到今日田地。
《The Athletic》报道，查顿辛祖加盟後冇耐，C朗拿度突然回归成为噩梦开端，曼联原本应承畀佢嘅7号波衫，最终同进攻核心嘅角色一齐畀咗C朗；兰历克接替苏斯克查执教後，C朗更曾要求兰历克由4-3-3改踢4-4-2，一个将查顿辛祖弃用嘅阵式，不过兰历克当时拒绝迁就，认为咁做会影响查顿辛祖嘅状态。
一直撑查顿辛祖嘅兰历克离任後，新上任嘅坦哈格对佢嘅纪律问题颇有微言。据报查顿辛祖因为经常迟到，坦哈格一度特意将查顿辛祖嘅训练安排调早1个钟头，最初虽然有成效，但久而久之又故态复萌。
