曼联球星安东尼马菲奥斯「家暴案」仍然火热，虽然佢於电视受访时矢口否认，但红魔决定同佢割席，周日（10日）晚官方发表声明，遣责任何暴力行为，球队现已同安东尼达成协议，将会延迟佢归队，直至另行通知，以应对有关指控。
23岁嘅安东尼被前女友Cavallin指控4项袭击罪，近日再有多2名女子报称被安东尼袭击，呢位翼锋日前接受巴西《SBT》访问，承认同Cavallin关系唔好经常闹交，whatsapp入面「想你死」嘅留言纯粹系意气说话，同时指Cavallin公开嘅对话内容系经过修改。
对於打女人嘅指控，安东尼就完全否认：「我100%肯定自己冇打过女友，我都有阿妈同妹妹，知道佢哋如果被打系咩感受，所以我肯定唔会咁做。」对於被巴西国家队踢走，安东尼表示：「我好难过，为巴西比赛系我嘅梦想，希望真相大白後我可以再为巴西效力。」
见到安东尼上电视「卖惨」，Cavallin亦不甘示弱，周日(10日)接受英国《太阳报》访问再次发炮：「好难相信曼联咁大间球员，有咁多专业人士管理，竟然会作出包庇行为，安东尼面对指控，点解可以生活如常、继续踢波？我唔理安东尼有几出名同几有地位，如果曼联对佢嘅队友(格连活特)作出处分，点解安东尼会唔同？我唔会放弃，一定要佢承担责任。」
