阿根廷「球王」美斯向北美第2个冠军进发！周四(24日)朝早美联盃4强大战，国际迈亚密喺先落後2球劣势下，凭美斯交出2次神级助攻，最终激战120分钟踢成3比3。国际迈亚密喺互射12码赢FC辛辛那提杀入决赛，9月27号会同侯斯顿戴拿模争冠军。
上周日(20日)赢完北美联赛盃冠军後，国际迈亚密今场作客FC辛辛那提陷入苦战，美斯受到对手重点招呼，国际迈亚密喺18分钟同53分钟连失2球。陷入出局边缘，受到冻结嘅美斯挺身而出，唔入波改玩助攻，68分钟美斯左路急劲罚球，李安纳度甘宾拿接应顶入。
一直努力制造机会嘅国际迈亚密，去到补时7分钟终於得手，美斯喺左路推进後大脚斩入禁区，再一次准确落喺李安纳度甘宾拿头顶，畀佢轻松顶入。加时只系3分钟，祖斯夫马天尼斯杀入禁区射入，为国际迈亚密反超前，不过FC辛辛那提亦展示「东岸1哥」实力，喺114分钟追成3比3。
