开季状态麻麻嘅曼联，周三(23日)喺一场闭门热身赛继续沉沦，对住新升班嘅般尼惨吞3蛋，表现令领队坦哈格相当失望。据法国《队报》报道，曼联准备喺转会窗完结前继续添兵救亡，尼斯嘅法国中坚图迪保盛传接近加盟，转会费为3,400万镑(约3.4亿港元)。
曼联开咧1胜1负，第1场对狼队赢波但表现极差，上仗更净吞热刺2蛋，周六(26日)迎战诺定咸森林前，坦哈格特别安排喺卡宁顿训练基地踢热身赛，对手系新升班嘅般尼。曼联今场用咗7名一队球员带住新人作战，包括安东尼马迪尔、麦汤米尼、云迪碧克等等。
虽然曼联只系半力出击，但一众後备球员状态始终谷唔起，尤其美臣蒙特受伤要抖1个月後，麦汤米尼同云迪碧克都有机会落场，点知今场完全唔够般尼砌，最终惨吞3蛋。今场担正嘅一队球员，唔少都喺坦哈格嘅出售名单上面，输埋之後留队机会更加渺茫。
