阿士东维拉今轮英超发威大炒爱华顿4比0，美中不足系後备上阵嘅菲腊比古天奴受伤离场，而且伤势唔轻，不过对维拉影响有限，反而前球队巴塞隆拿损失至少1,000万欧元(约8,500万港元)收入，点解咁嘅？
古天奴今季英超已後备上阵两场，大炒爱华顿一仗，只系上阵21分钟就受伤离场，现场所见佢左脚受伤，要两名工作人员扶住出场，左脚唔可以掂地，状甚痛苦。
由於受伤，古天奴今夏转会窗关闭前出售机会不大，要继续留喺维拉养伤，对维拉嚟讲影响有限，但对於财政拮据嘅巴塞就唔同，西班牙传媒报道，原来巴塞出售古天奴畀维拉时有协议，如果古天奴下次转会，其转会费超过2,000万欧元(约1.7亿港元)，巴塞可获50%分帐，亦即1,000万欧元。
报道指，古天奴近日受沙特球队探盘，以沙特近日高调收购球星情况，转会费超过2,000万欧元绝无问题，而巴塞正等待分帐解燃眉之急，如今古仔重伤，巴塞梗系笑唔出。
