白礼顿近年不断出售主力，但无阻其神奇表现，喺周六(19日)晚作客以4比1大胜狼队，日本国脚三笘薰球王上身，射入「美斯式金球」，仲有1次助攻，以呢位26岁翼锋超卓表现，好大机会成为下一位登入豪门嘅白礼顿球员。
白礼顿今夏出售2位中场大将阿历斯麦亚里士打、摩西斯卡些度，但对於球队表现冇影响，继上仗以4比1大胜卢顿之後，今场再以同样比数击败狼队，2战2胜，净得球比曼城多2球，加上水晶宫对阿仙奴要等到周二(22日)凌晨先至交锋，令到白礼顿史上首次喺顶级联赛稳坐榜首「过夜」。
白礼顿连场大胜，三笘薰居功厥伟，佢喺上场对卢顿，已贡献1次助攻，今仗开波15分钟，个人突破，摆脱4位狼队球员夹击，冷静射入为球队打开纪录，踢到同美斯一样咁款。
