周六（12日）晚英超首轮头场，上仗勇夺社区盾嘅阿仙奴延续强势，凭两位青训产品尼基迪亚同布卡约沙卡各省一粒，喺主场以2比1击败诺定咸森林，旗开得胜。
阿仙奴今季全面推行电子门票，但因为个系统出咗问题，搞到赛前仍有大量「厂迷」入唔到场，被迫延迟半个钟先开波。阿仙奴主帅阿迪达再次变阵，上仗社区盾试用夏维斯客串前锋，呢位德国国脚今仗都系正选上阵，不过箭头位改由尼基迪亚担任，而啱啱从阿仙奴加盟森林嘅门将马特瑞纳，立即倒戈。
一开波森林立即获得黄金机会，可惜突破越位嘅班伦庄臣射高，之後阿仙奴围住嚟攻，26分钟加比尔马天尼利於左路突破，想用施丹式转身过人不成，反而无心插柳变咗後脚靓交，畀「小偷」尼基迪亚快射近柱得手，先开纪录。32分钟轮到布卡约沙卡喺右路，扣大位起左脚轰入世界波破网，完半场前贵价新兵迪格兰赖斯远射被救出，阿仙奴领先两粒返入更衣室。
