法甲2连冠嘅巴黎圣日耳门(PSG)今季锋线星散之下，开锣第1场联赛就失分，主场仅同罗连安特打和0比0，因为拒绝续约而被雪藏嘅射手基利安麦巴比有入场睇波，传媒影到佢同新队友奥士文尼迪比利喺观众席上谈笑风生，见到PSG失分，甚至偷笑，相信佢同球会嘅关系已经无法修补。
PSG今季除咗失去球王美斯，以及基利安麦巴比拒绝续约之外，另一位前锋尼马、中场马高华拉堤亦有可能离队，冇份入选今场大军名单，教练安历基以3位新兵干卡路、马高阿辛斯奥、李康仁组成锋线，攻力大打折扣，面对罗连安特，变成老鼠拉龟，无从入手，导致闷和0比0。
观众席上嘅基利安麦巴比反而更吸引传媒目光，呢位法国国脚同由巴塞隆拿来投嘅奥士文尼迪比利一齐睇波，据悉PSG签入迪比利，就系为咗取代麦巴比，难怪网民认为「麦总」可能交代紧工作畀对方。
