法甲冠军巴黎圣日耳门(PSG)星散危机愈演愈烈，继美斯今夏离队，基利安麦巴比拒绝续约之後，将再面临痛失另一位球星尼马。根据法国《队报》爆料，呢位31岁巴西射手喺周日(6日)向会方提出离队要求，背後原因可能涉及佢受到极端PSG球迷针对，担心新一季冇咗2位拍档美斯及麦巴比「掩护」，成为众矢之的，令人身安全受威胁，所以走为上着。
尼马2017年以破世界转会费纪录嘅2.22亿欧元(约19亿港元)由巴塞隆拿加盟巴黎圣日耳门以来，演出令人失望，除咗场上发挥唔出应有水准之外，亦经常受伤，入「门」6季以来，有5季联赛上阵次数系20次或以下，被网民嘲讽每逢大时大节、妹妹生日，尼马就会「自动受伤」，加上曾经同麦巴比闹不和，PSG管理层近年开始对尼马不满，上年夏天几乎出售佢。
至於尼马亦因为屈居於美斯、麦巴比之下，未能担任「大佬」，一直心有不甘，令佢最想走人嘅原因系受到PSG球迷针对，除咗比赛期间嘘佢之外，今年5月更加有大批球迷包围佢住所示威，高呼要求尼马离队，并以粗言秽语辱骂佢，幸好冇发生冲突。
不过，「围堵尼马」一事已经令呢位前锋心感不安，加上好兄弟美斯已离队，麦巴比因为拒绝续约，就算今夏唔被卖走，亦会被雪藏，意味一旦PSG新一季成绩欠佳，仅余最大名气球星尼马必定成为球迷攻击目标，虽然佢仲有2年合约在身，但都宁愿自己申请今夏离队「避难」，并已经通知PSG会长艾卡理化有关决定。
