曼联喺热身赛虽然反胜朗斯3比1，但2位新兵首次喺主场奥脱福球场上阵，演出令人失望，除咗门将奥拿拿「派胶」，遭对方半场起脚笠入之外，获得「传奇7号」球衣嘅美臣蒙特亦连番错失入波机会，包括离门6码「左脚射中右脚」帮对手解围，难怪被指中咗「7号魔咒」。
美臣蒙特今仗正选上阵，踢到14分钟有1次入波黄金机会，阿历真度加拿祖左路传中，美臣蒙特离门6码面对空门，无人看管之下用左脚射门，却省中自己右脚弹後，认真「离奇」。6分钟後，呢位24岁英格兰国脚禁区内劲射，被对手挡出底线，即使踢足全场，但都冇乜建树。
美臣蒙特上月以6,000万镑(约6亿港元)转会费由车路士加盟曼联，并获得C朗留下嘅7号球衣，被寄予厚望，但佢踢咗6场热身赛，冇入波亦冇助攻，难怪开始有舆论认为佢难逃「7号魔咒」宿命。
