距离英超开锣仲有1个星期多啲，上季亚军阿仙奴传出噩耗，巴西前锋加比尔捷西斯膝部旧患复发，即时做手术治疗，预计要休息约6个星期时间，将会错过对曼联等大战。不过，阿仙奴周四(3日)凌晨喺酋长盃互射12码击败摩纳哥捧盃，周日(6日)社区盾对曼城前先振军心。
捷西斯喺上年底世盃膝部受伤，一度休息3个月，不过近日旧患复发，领队阿迪达证实：「捷西斯做咗个小手术，佢个膝头有啲问题需要解决，同佢上次手术有关，唔系咩严重伤患，但都要抖几个星期。」消息指捷西斯嘅休养期约6个星期，如果属实佢会错过周日社区盾，同时缺席开季头5轮赛事，当中包括9月3日主场对曼联。
主力前锋受伤下，阿仙奴周四喺酋长盃迎战法甲嘅摩纳哥踢成均势，客队喺31分钟凭尤索夫科芬拿头槌先开纪录，代替捷西斯出任箭头嘅尼基迪亚，完半场前接应传中近门射入追平，两队踢成1比1要互射12码分胜负，阿仙奴门将兰斯达尔救出1球，而5位主罚球员全部射入，阿仙奴最终12码赢5比4捧盃。
