阿仙奴今个夏天用破球会纪录1.05亿镑(约10.4亿港元)收购迪格兰赖斯，令球迷非常期待，不过旧「标王」尼高拉斯比比几乎被遗忘，佢上季被外借尼斯回归後，连季前热身都冇份参加，据报阿仙奴近日同佢倾解约，畀佢免费去土超搵食，当年买佢嘅7,200万镑(约7.14亿港玩)射晒落海。
转会权威Fabrizio Romano报道，土超劲旅比锡达斯正同阿仙奴商讨签入尼高拉斯比比，目前正就细节交涉，由於呢位科特迪瓦国脚周薪达到14万镑(约140万港元)，比锡达斯冇能力再支付转会费，所以阿仙奴会考虑同尼高拉斯比比提早解除剩低嘅1年合约，畀佢以自由身转会。
阿仙奴4年前以破球会纪录7,200万镑向里尔收购尼高拉斯比比，但佢加盟後一直踢唔出水准，历来为阿仙奴上阵112场入27球，贡献同佢高昂嘅身价唔成正比。28岁嘅尼高拉斯比比报称受伤，缺席阿仙奴所有季前热身赛。
