今夏获普捷天奴执教嘅车路士，大换血後再见成效，周一(31日)凌晨喺美国举行嘅英超「夏季赛」2比0击败富咸，成功赢得呢个有6支英超球队参加嘅赛事冠军。车路士前锋尼干古今场又有入波，4场季前热身入3球，有望解决「蓝战士」上季锋力不足嘅问题，据报佢哋仲扑槌签入法国中坚阿素迪沙斯，准备新球季大展拳脚。
车路士今场控制战局，20分钟就由堤亚高施华喺角球攻势顶入，去到41分钟卓克禾美卡前场截击後起脚射门，富咸门将宾特尼奴挡出不远，今场演出非常活跃嘅尼干古门前补入，亦系呢位法国前锋加盟後，4场热身赛第3个入球。下半场车路士更换大部份球员，结果两队再冇入波，车路士赢2比0。
车路士喺「夏季赛」头2场分别4比3赢白礼顿同1比1和纽卡素，最终以2胜1和成绩赢得冠军，阿士东维拉同纽卡素各得5分排第2位，宾福特3战只得1分喺6队入面垫底。车路士由堤亚高施华同列斯占士做代表捧盃，普捷天奴赛後表示：「捧盃总系开心，我认为球员做得好好，短时间内我哋踢咗几场，依家要继续好好准备。」
新加盟嘅尼干古同尼高拉斯积逊喺热身赛表现突出，普捷天奴对呢个前锋组合亦信心十足：「我哋尝试令佢哋更加合拍，见到佢哋融合得咁好系一件好事，我哋会系未来2个星期再检讨，睇下系咪需要再签前锋，有好球员加入当然欢迎，但我已经好满意佢哋两个嘅表现。」
5
