葡萄牙女足喺今届女子世盃表现出色，喺E组最後一轮将同「擂台趸」美国女足争出线，虽然外界一致睇好美国女足，不过葡萄牙女足超新星妮莎莉夫伤愈，就令佢哋保持一丝争胜希望。妮莎莉夫上轮已打破C朗嘅葡萄牙最年轻世盃入球纪录，前途无限。
效力宾菲加嘅妮莎莉夫，17岁就为葡萄牙女足上阵，今次首登世盃舞台，决赛周前已被睇好会上位，「金牌经理人」佐治文迪斯喺3月率先将佢招揽，系佢旗下第1个女足球员。妮莎莉夫首仗对荷兰女足因伤只做後备，令葡萄牙女足进攻力大减，不过上场对越南女足复出即入波，令佢以20岁8个月之龄，打破C朗拿度喺2006年世盃入波(21岁132日)，成为葡萄牙史上最年轻世盃入球者。
