巴黎圣日耳门(PSG)球星基利安麦巴比拒绝续约，亦唔肯转投希拉尔，去留陷入僵局嘅时候，利物浦乘虚而入，计划借用呢位24岁法国射手，由於麦巴比嘅妈妈兼经理人拉玛莉系「死忠」利物浦球迷，有望促成呢单世纪转会。
基利安麦巴比「躺平」，决心等明夏约满拎9,000万欧元(约7.7亿港元)「忠诚金」，以自由身转投梦寐以求嘅皇马，日前已经表明唔会接受沙特阿拉伯豪门希拉尔开出嘅7亿欧元(约60亿港元)年薪合约，PSG亦收唔到3亿欧元(约28亿港元)转会费，管理层现时非常头痛，担心明夏眼白白睇住麦巴比离队，人财两失，希望搵方法减少损失。
根据英国《镜报》爆料，利物浦扮演「救世主」，打算借用麦巴比1季，并会支付一笔「丰厚」借用费及负担麦巴比嘅人工，如果PSG接受，起码可以执番些少「补偿」，有传两间球会已经展开讨论。
英国传媒指呢个系「三赢方案」，利物浦获得麦巴比加盟，可大幅提升实力争标，PSG获得收入及减少巨额薪酬负担，麦巴比亦可以避免遭PSG雪藏1季嘅风险，继续有得踢高水平赛事，以最佳状态等明夏加盟皇马。
英国《镜报》指基利安麦巴比并唔抗拒为利物浦效力，最关键系佢妈妈兼经理人拉玛莉系「死忠」红军球迷，早於麦巴比效力摩纳哥时期，拉玛莉曾经同利物浦倾过签入囝囝嘅事宜，麦巴比亦承认的确有其事：「我哋以前有同利物浦倾过，呢支系妈妈最爱嘅球队。」
